ಮೈಸೂರು ನಗರ ಸೈಬರ್ ಪೊಲೀಸರಿಂದ ಎಚ್ಚರಿಕೆ

ಮೈಸೂರು ನಗರ ಸೈಬರ್ ಪೊಲೀಸರಿಂದ ಸಾರ್ವಜನಿಕರಲ್ಲಿ ಅನ್‌ಲೈನ್/ಸೈಬರ್ ವಂಚನೆಗಳ ಬಗ್ಗೆ ಎಚ್ಚರಿಕೆಯಿಂದ ಇರುವಂತೆ  ಸೂಚನೆ ನೀಡಲಾಗಿದೆ

ಇತ್ತೀಚಿನ ದಿನಗಳಲ್ಲಿ ಸೈಬರ್ ಅಪರಾಧಗಳು ಹೆಚ್ಚಿನ ಸಂಖ್ಯೆಯಲ್ಲಿ ವರದಿಯಾಗುತ್ತಿದ್ದು, ಸಾರ್ವಜನಿಕರಿಗೆ ಅನ್‌ಲೈನ್‌ನಲ್ಲಿ ಅಮಿಷವೊಡ್ಡಿ ಹಲವು ವಿವಿಧ ರೀತಿಗಳಲ್ಲಿ ಅಮಾಯಕರಿಂದ ಈ ಕೆಳಕಂಡಂತೆ ಮೋಸ ಮಾಡುತ್ತಿರುವುದು ಕಂಡು ಬಂದಿರುತ್ತದೆ.

ಡಿಜಿಟಲ್ ಅರೆಸ್ಟ್

ಸೈಬರ್ ಅಪರಾಧಿಗಳು ಪೊಲೀಸರು ಅಥವಾ ತನಿಖಾ ಸಂಸ್ಥೆ ಹೆಸರು ಹೇಳಿಕೊಂಡು ಜನರಿಗೆ ಕರೆಮಾಡಿ ವಂಚಿಸುತ್ತಿದ್ದಾರೆ. ನಿಮ್ಮ ಮನೆಯ ವಿಳಾಸಕ್ಕೆ ಪೆಡೆಕ್ಸ್ ಅಥವಾ ಬೇರೆ ಕಂಪನಿ ಕೊರಿಯರ್‌ನಿಂದ ಪಾರ್ಸಲ್ ಬಂದಿದೆ ಅಥವಾ ನಿಮ್ಮ ವಿಳಾಸದಿಂದ ಕಳುಹಿಸಲಾಗಿದೆ ಎಂದು ಹೇಳುವ ಸೈಬರ್ ವಂಚಕರು. ನಿಮ್ಮ ದಾಖಲಾತಿಗಳು ಡ್ರಗ್ಸ್ ವ್ಯವಹಾರದಲ್ಲಿ & ಮನಿ ಲಾಂಡರಿಂಗ್ ನಲ್ಲಿ ತೊಡಗಿದೆ ಎಂದು ಹೇಳಿ ಭಯ ಹುಟ್ಟಿಸುತ್ತಾರೆ. ಬಳಿಕ ಸೈಪ್ ಲಿಂಕ್ ನೀಡಿ ಲಾಗಿನ್ ಆಗುವಂತೆ ತಿಳಿಸುವ ವಂಚಕರು, ಪೊಲೀಸ್ ಸಮವಸ್ತ್ರದಲ್ಲೆ ಅಥವಾ ಸಿಬಿಐ/ಇಡಿ ವಿಭಾಗದ ಹಿರಿಯ ಅಧಿಕಾರಿಗಳ ಸೋಗಿನಲ್ಲಿ ಸಂಭಾಷಣೆ ನಡೆಸುತ್ತಾರೆ. ಸಿಬಿಐ/ಇಡಿ ಯ ಪ್ರಮುಖ ವ್ಯಕ್ತಿಗಳ/ರಾಜಕಾರಣಿಗಳ ಪ್ರಕರಣಗಳಲ್ಲಿ ನೀವು ಭಾಗಿಯಾಗಿದ್ದೀರೆಂದು ತಿಳಿಸಿ ಸರ್ವೋಚ್ಛ ನ್ಯಾಯಾಲಯದ/ ಆರ್ ಬಿ ಐ/ಇಡಿ/ಸಿಬಿಐ ಪತ್ರಗಳನ್ನು ಸೃಷ್ಟಿಸಿ ಅದರಲ್ಲಿ ಸರ್ಕಾರಿ ಇಲಾಖೆಯ ಚಿಹ್ನೆಗಳನ್ನು ಮತ್ತು ಹಿರಿಯ ಐಪಿಎಸ್ ಅಧಿಕಾರಿಗಳ ಹೆಸರು ಮತ್ತು ಸಹಿಯನ್ನು ಬಳಸಿರುವ ಪತ್ರಗಳನ್ನು ಸೈಪ್ ಆಪ್ ಮೂಲಕ ಕಳುಹಿಸುತ್ತಾರೆ. ನಂತರ ವಿಚಾರಣೆಗೆ ಹಾಜರಾಗಬೇಕೆಂದು ಬೆದರಿಕೆ ಹಾಕುತ್ತಾರೆ. ವಿಚಾರಣೆಗೆ ವಿನಾಯಿತಿ ಬೇಕಾದರೆ ಬ್ಯಾಂಕ್ ಖಾತೆಗೆ ಹಣ ಹಾಕಿ. ಇಲ್ಲದಿದ್ದರೆ ಬಂಧಿಸುತ್ತೇವೆ ಅಥವಾ ನಿಮ್ಮ ಮನೆ ಮೇಲೆ ರೈಡ್ ಮಾಡಿ ದಸ್ತಗಿರಿ ಮಾಡುತ್ತೇವೆಂದು ತಿಳಿಸುತ್ತಾರೆ. ಬಳಿಕ ಹಲವು ಗಂಟೆಗಳ ಕಾಲ ಸ್ಟೆಪ್ ಬಿಟ್ಟು ಬೇರೆ ಕಡೆ ಹೋಗಲು ಬಿಡುವುದಿಲ್ಲ. ನಿಮ್ಮನ್ನು

ಡಿಜಿಟಲ್ ಅರೆಸ್ಟ್ ಮಾಡಲಾಗಿದೆ ಇಲ್ಲೇ ಇರಬೇಕೆಂದು ಬೆದರಿಕೆ ಹಾಕಲಾಗುತ್ತದೆ.

ಷೇರುಮಾರುಕಟ್ಟೆಯಲ್ಲಿ ಹೂಡಿಕೆ ವಂಚನೆ

ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿದರೆ ಉತ್ತಮ ರಿಟರ್ನ್ ನೀಡುವ ಭರವಸೆಯೊಂದಿಗೆ ವಾಟ್ಸಾಪ್, ಟೆಲಿಗ್ರಾಂ ಗ್ರೂಪ್‌ಗಳ ಮೂಲಕ ಸೈಬರ್ ವಂಚಕರು ಈಗಾಗಲೇ ಹಲವಾರು ಜನರಿಗೆ ಕೋಟ್ಯಂತರ ರೂಪಾಯಿ ವಂಚಿಸಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತು ವಾಟ್ಸಾಪ್, ಟೆಲಿಗ್ರಾಂ ಗ್ರೂಪ್‌ ಗಳಲ್ಲಿ ಷೇರು ಮಾರುಕಟ್ಟೆಯಲ್ಲಿ ಹಣವನ್ನು ಹೂಡಿಕೆ ಮಾಡಿ ಹೆಚ್ಚಿನ ಲಾಭ ಗಳಿಸುವ ಬಗ್ಗೆ ಜಾಹೀರಾತುಗಳನ್ನು ನೀಡುತ್ತಾರೆ. ಮೊದಲಿಗೆ ನೈಜವಾದ ಆಪ್ ಅಥವಾ ವೆಬ್ ಸೈಟ್ ಮೂಲಕ ಹಣವನ್ನು

ಹೂಡಿಕೆ ಮಾಡಿಸಿ ಲಾಭ ಬರುವಂತೆ ಸಲಹೆಗಳನ್ನು ನೀಡುತ್ತಾರೆ. ನಂತರ ತಮ್ಮದೆ ಆದ ಕಂಪನಿಯ ಮುಖಾಂತರ ಹೂಡಿಕೆ ಮಾಡಿದರೆ ಹೆಚ್ಚಿನ ಲಾಭ ಗಳಿಸಬಹುದೆಂದು ಆಸೆ ತೋರಿಸಿ ನಕಲಿ ಆಪ್ ಅಥವಾ ವೆಬ್‌ಸೈಟ್ ಮುಖಾಂತರ ಹಣವನ್ನು ಹೂಡಿಕೆ ಮಾಡಿಸಿಕೊಂಡು ನಕಲಿ ಆಪ್ ಅಥವಾ ವೆಬ್‌ಸೈಟ್ ನಲ್ಲಿ ಹೆಚ್ಚಿನ ಲಾಭ ಬಂದಿರುವುದಾಗಿ ತೋರಿಸುತ್ತಾ ಹಣವನ್ನು ಬ್ಯಾಂಕ್ ಖಾತೆಗೆ ವರ್ಗಾಹಿಸಲು ತೋರಿಸಿದಾಗ ಟ್ಯಾಕ್ಸ್/ಜಿಎಸ್‌ಟಿ/ಇತರೆ ಚಾರ್ಜ್‌ಗಳನ್ನು ಪಾವತಿಸಬೇಕೆಂದು ಹೇಳಿ ಹೆಚ್ಚಿನ ಹಣವನ್ನು ವರ್ಗಾಹಿಸಿಕೊಂಡು ಯಾವುದೇ ಲಾಭವನ್ನಾಗಲೀ, ಹೂಡಿಕೆ ಮಾಡಿದ ಹಣವನ್ನಾಗಲೀ ವಂಚಿಸುತ್ತಾರೆ.